die vertschubblete

Am ene stirmische Herbscht-Oobe im Joor 1975 hänn sich vier aagfrässeni
Fasnächtler derzue entschlosse, en aigeni Glygge z grinde. Im ene Stamm-
verain hänn sii sich nimme wohl gfylt und hänn dorum ghandlet; will sii
d Grinderinnen und d Grinder vo unserer Glygge sinn, sage mir do au
ihri Nämme: Henriette und Marcel Grunder, Stephanie und Daniel Witta;
zwai Pfyfferinne, e Major und ai Drummler. Drey vo ihne sinn vo den Optimischte ko.
Die Vier hänn denn grad aagfange, im Bekannte-Krais neyi Mitgliider fir ihr
ney Grippli aazwärbe. Eso sinn an dr Fasnacht 1976 scho vier Vorträäbler ( Zwai
dervo hänn sogar no s Ladärnli drait ! ), fimf Pfyffer, dr Major und drey Drummler
im Charivari und nammelos uff d Route gange.
No dr erschte Fasnacht het me gfunde, me miess sich jetzt au dr richtig Rahme
schaffe und het sich uff Statuten und e Glygge-Namme gainigt ka.
Dr Namme "die Vertschubblete" kunnt doderhär, ass vyli Glygge-Mitgliider
Motorrad-Fahrer gsi sinn; und wo ain vo ihne dr Helm abzoge het, hänn die
andere uff s Mool dr Namme ka...
...
Jetzt, wo mer e richtige Verain worden sinn, mit allem drumm und dra, het ys
dr doomoolig Obmaa bim Fasnachts-Comité aagmäldet, und die Vertschubblete
hänn an dr Fasnacht 1977 s erscht Mool offiziell dr Cortège gloffe.
Unseri erschti Subvention vo 400.-- Frangge het ys eso iberrascht, ass mir
mit Elan an wyteren Uffbau gange sinn.
...
Am 18. Auguscht 1979 het au unseri Odyssee in zahlryche Lokal en Änd
gfunde: Mer hänn derfen unseren erschte Glygge-Käller am Parkwäg 30 ereffne !
Vorhär simmer vo dr Linde, iber e Gryffe bis zer Urban-Stube zooge und sinn
niene richtig dehai gsi. Jetz hämmer pletzlig Platz zem Pfyffe, Drummlen und
Baschtle ka. Mer hänn die erschten aigene Kopfladärnli gnait und gmoolt ( e
scheene Grampf ! ) und hänn an dr Fasnacht 1981 s allererscht Mool en ain-
haitlig Gossdym ka. D Larve sinn doozmool no vom Guschti Hohl gsi.
Mir hänn au s Drummlen und s Pfyffe welle verbessere und hänn s erscht
Mool Aafänger-Kirs fir Erwaggseni duuregfiert. Im Baslerstab isch unser Inserat
erschiinen under em Motto: "Bisch 16 gsi und duesch pfyffe, oder mechtsch
gärn lehre, die Kunscht z begryffe, duesch Du emänd gar drummle, oder mechtsch
aifach im Vortrab bummle..."
Uff das Inserätli aabe hänn sich eso vyl Neymitgliider gmälde, ass mer fascht
dr Hooseflatteri beko hätte. Im Aafänger-Kurs vo de Pfyffer sinn iber 20 (!) Lyt
gsässe. Eso sinn an dr Fasnacht 1982 im Vortrab 27 (!) Vertschubbleti gloffe,
14 Pfyffer, dr Major und 4 Drummler hänn s Spiil bildet. Unsere grosse Vortrab isch
au no hit unsere Stolz und unser Margge-Zaiche !
...
Will unser gliebt Glygge-Haim emene Neybau het miesse wyche, sinn mir froh
gsi, ass mer no dr Fasnacht 1987 hänn derfen in unsere nigelnagelneye Käller an
dr Sevogelstrooss 115 zieh, wo mir hit no dehaim sinn.
...
Als erschti Glyggen iiberhaupt hänn mir im Herbscht 1989 im Baslerstab en Aagebot
fir e Schnupper-Fasnacht inseriert.