Guggemusik Ventil-Blöterler

Im Johr 1962 hei sich es paar Nase uf d’Socke gmacht und si mit Gitarre, Wöschbrätt und säubergmachte Instrumänt z’Fasnacht. Dört hei si de i verschidene Lokal und Beize d’Lüt mit ihrne Darbietige ungerhaute.

Hüt si die ca. 40 Froue und Manne mit „modernere“ Instrumänt usgrüschtet. Vo de Trompete über Posune, Horn, Susis, Sax ect. bis zu de moderne Schlagzüüg isch aues verträtte. D’Mischig zwüsche de öutere Mitglider mit Erfahrig und de Junge mit nöie Idee macht die Gruppe zu öppis ganz Speziellem.

Si träffe sich ab em Septämber jede Fritigobe zu de Probe um die öutere Stück wider ufzfrüsche und natürlich neui Stück ischtudiere . Es git ou 3 bis 4 Intensiv-Probetäg wosi de „stränger“ dragno wärde.

D’Hauptaktivität vo de „Ventil-Blöterler“ isch ganz klar d’Fasnachtszyt. Do si die immer guet agleite und gschminkte Gugger i de Beize, a Maskebäu, Streetgugge-Partys, Umzüg ect. z’ghöre . Mit ihrem Rhythmus wo eifach iifahrt und ihrne Super-Stück wo aui könne, bringe Si ou dr letscht Fasnachts-Muffu ufe Bank oder Stuel.

Wenn de no „s’Leilola“ azöut wird isch de ändgüutig fertig mit dr Ruei. Das Stück spile si scho bau 10 Johr aber es geit immer no Poscht ab.I der letschti sogar mit Füürwärch us Begleitig !! Isch de die närrischi Zyt verbii wird’s de wider e chli ruehiger . Mi ghörtse de öppe amene Hochzyt oder amene Geburtstag spile wo de ou e 90jährige Jubilar wider ufläbt. Zur Tradition ghört de ou es feins Abschlussässe, das immer beliebte Schiiweekend oder düre Summer mou es Träffe um eifach die tolli Kameradschaft wo i dere Gruppe herscht z’Pflege .

Wenn jetz no meh wotsch wüsse oder sogar bi üs aktiv wetsch mitmache, de nüt wie los und due Di bi üs mäude oder chum eifach mou cho ineluege.