Trachtengruppe Schüpbach

Im Februar 1946 isch d’Trachtegruppe Schüpbach gründet worde. Es paar jungi Froue vom Landfroueverein si ds’Bärn are Tagig gsi. Am gmüetleche Unterhautigsaabe isch o e Trachtegruppe ufträte. Das het dene Froue us Schüpbach so guet gfaue, dass der Wunsch ufcho isch, o so öppis uf d’Bei z’steue. Im Früehlig 1963 isch e Volkstanzkurs für Meitschi u Bursche düregfüehrt worde u das isch so guet ahcho, dass mir vo denn ah e gmischti Gruppe sy.

Üsi Gruppe zeut hüt rund 50 Mitglieder, vo jung bis jungblibe. Über nöii Gsichter bim Tanze, bim Singe oder gar bi beidem fröie mir üs sehr!