Schnadehüdeler 

D'Töffe im Schopf si zuedeckt und d'Mitglieder vom Töffclub hocke ir Beiz und jasse! "Sch...-Wätter" dusse und immer nume jasse das chas jo ou nid si. Chum mir wei wieder mou öppis Nöis afo, gli isch Fasnacht mir mache doch e Gugge, so chönnts im Winter 1976 z'Günschberg im Bellevue tönt ha. Was weit dir jetz do dir "Schnadene" tönts vom Näbetisch! Heb doch dr Latz du "Hudere" hei mir umegäh!! So eifach isch dr Name Schnadehüdeler entschtange.

Im Schwingchäuer vom Bellevue und im Schützehuus-Chäuer hei mir probet. A dr Fasnacht 1976 si mir mit de Chessler-hemmli uf em bekränzte Wage los, zoge vomene Traktor und si uf Tournee gange: vo Günschberg über Rüttene, Solodurn, Zuchu, Luterbach und Hopperschte si mir natürlich i aune Beize gsi. D'Lüüt hei e riese Fröid gha und mir natürlich ou. S'Johr druf si einigi vo üs is Militär, drum hei mir d'Fasnacht müesse lo usfaue! Die nöchschte Johr drufabe hei mir gäng dervo gredt das mir wieder wette afo. Aber gäng wenn's so wiit isch gsi si mir z'schpot gsi, probet hei mi no nie und d'Fasnacht het scho agfange.

Im 1984 si mir de ändlech zäme ghocket, hei afo probe und hei d'Gründigsversammlig gmacht. D'Fasnacht isch e riesiege Erfoug gsi, mir hei üs aus Höhepunkt am Zischti-Obe sogar i d'Stadt gwogt und hei fasch nümme hei chönne. Am 20.04.85 het die erschti GV mit 31 Mitglieder stattgfunge. Dr Gurtner Roli isch dr Oberschnade und die musikalischi Tunte gsi!